Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Leviticus

◄◄ | ◄ | Глава ⚫ | ► | ►►

¹ confringetque ascellas eius et non secabit nec ferro dividet eam et adolebit super altare lignis igne subposito holocaustum est et oblatio suavissimi odoris Domino

² anima cum obtulerit oblationem sacrificii Domino simila erit eius oblatio fundetque super eam oleum et ponet tus

³ ac deferet ad filios Aaron sacerdotes quorum unus tollet pugillum plenum similae et olei ac totum tus et ponet memoriale super altare in odorem suavissimum Domino

⁴ quod autem reliquum fuerit de sacrificio erit Aaron et filiorum eius sanctum sanctorum de oblationibus Domini

⁵ cum autem obtuleris sacrificium coctum in clibano de simila panes scilicet absque fermento conspersos oleo et lagana azyma oleo lita

⁶ si oblatio tua fuerit de sartagine similae conspersae oleo et absque fermento

⁷ divides eam minutatim et fundes supra oleum

⁸ sin autem de craticula sacrificium aeque simila oleo conspergetur

⁹ quam offeres Domino tradens manibus sacerdotis

¹⁰ qui cum obtulerit eam tollet memoriale de sacrificio et adolebit super altare in odorem suavitatis Domino

¹¹ quicquid autem reliquum est erit Aaron et filiorum eius sanctum sanctorum de oblationibus Domini

¹² omnis oblatio quae offertur Domino absque fermento fiet nec quicquam fermenti ac mellis adolebitur in sacrificio Domini

¹³ primitias tantum eorum offeretis et munera super altare vero non ponentur in odorem suavitatis

¹⁴ quicquid obtuleris sacrificii sale condies nec auferes sal foederis Dei tui de sacrificio tuo in omni oblatione offeres sal

¹⁵ sin autem obtuleris munus primarum frugum tuarum Domino de spicis adhuc virentibus torres eas igni et confringes in morem farris et sic offeres primitias tuas Domino

¹⁶ fundens supra oleum et tus inponens quia oblatio Domini est

¹⁷ de qua adolebit sacerdos in memoriam muneris partem farris fracti et olei ac totum tus