Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Evangelium secundum Ioannem

◄◄ | ◄ | Глава ⚫ | ► | ►►

¹ et dicit ei amen amen dico vobis videbitis caelum apertum et angelos Dei ascendentes et descendentes supra Filium hominis

² et die tertio nuptiae factae sunt in Cana Galilaeae et erat mater Iesu ibi

³ vocatus est autem ibi et Iesus et discipuli eius ad nuptias

⁴ et deficiente vino dicit mater Iesu ad eum vinum non habent

⁵ et dicit ei Iesus quid mihi et tibi est mulier nondum venit hora mea

⁶ dicit mater eius ministris quodcumque dixerit vobis facite

⁷ erant autem ibi lapideae hydriae sex positae secundum purificationem Iudaeorum capientes singulae metretas binas vel ternas

⁸ dicit eis Iesus implete hydrias aqua et impleverunt eas usque ad summum

⁹ et dicit eis Iesus haurite nunc et ferte architriclino et tulerunt

¹⁰ ut autem gustavit architriclinus aquam vinum factam et non sciebat unde esset ministri autem sciebant qui haurierant aquam vocat sponsum architriclinus

¹¹ et dicit ei omnis homo primum bonum vinum ponit et cum inebriati fuerint tunc id quod deterius est tu servasti bonum vinum usque adhuc

¹² hoc fecit initium signorum Iesus in Cana Galilaeae et manifestavit gloriam suam et crediderunt in eum discipuli eius

¹³ post hoc descendit Capharnaum ipse et mater eius et fratres eius et discipuli eius et ibi manserunt non multis diebus

¹⁴ et prope erat pascha Iudaeorum et ascendit Hierosolyma Iesus

¹⁵ et invenit in templo vendentes boves et oves et columbas et nummularios sedentes

¹⁶ et cum fecisset quasi flagellum de funiculis omnes eiecit de templo oves quoque et boves et nummulariorum effudit aes et mensas subvertit

¹⁷ et his qui columbas vendebant dixit auferte ista hinc nolite facere domum Patris mei domum negotiationis

¹⁸ recordati vero sunt discipuli eius quia scriptum est zelus domus tuae comedit me

¹⁹ responderunt ergo Iudaei et dixerunt ei quod signum ostendis nobis quia haec facis

²⁰ respondit Iesus et dixit eis solvite templum hoc et in tribus diebus excitabo illud

²¹ dixerunt ergo Iudaei quadraginta et sex annis aedificatum est templum hoc et tu tribus diebus excitabis illud

²² ille autem dicebat de templo corporis sui

²³ cum ergo resurrexisset a mortuis recordati sunt discipuli eius quia hoc dicebat et crediderunt scripturae et sermoni quem dixit Iesus

²⁴ cum autem esset Hierosolymis in pascha in die festo multi crediderunt in nomine eius videntes signa eius quae faciebat

²⁵ ipse autem Iesus non credebat semet ipsum eis eo quod ipse nosset omnes

²⁶ et quia opus ei non erat ut quis testimonium perhiberet de homine ipse enim sciebat quid esset in homine