Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Epistula II ad Corinthios

◄◄ | ◄ | Глава ⚫ | ► | ►►

¹ non quia dominamur fidei vestrae sed adiutores sumus gaudii vestri nam fide stetistis

² statui autem hoc ipse apud me ne iterum in tristitia venirem ad vos

³ si enim ego contristo vos et quis est qui me laetificet nisi qui contristatur ex me

⁴ et hoc ipsum scripsi ut non cum venero tristitiam super tristitiam habeam de quibus oportuerat me gaudere confidens in omnibus vobis quia meum gaudium omnium vestrum est

⁵ nam ex multa tribulatione et angustia cordis scripsi vobis per multas lacrimas non ut contristemini sed ut sciatis quam caritatem habeo abundantius in vobis

⁶ si quis autem contristavit non me contristavit sed ex parte ut non onerem omnes vos

⁷ sufficit illi qui eiusmodi est obiurgatio haec quae fit a pluribus

⁸ ita ut e contra magis donetis et consolemini ne forte abundantiori tristitia absorbeatur qui eiusmodi est

⁹ propter quod obsecro vos ut confirmetis in illum caritatem

¹⁰ ideo enim et scripsi ut cognoscam experimentum vestrum an in omnibus oboedientes sitis

¹¹ cui autem aliquid donatis et ego nam et ego quod donavi si quid donavi propter vos in persona Christi

¹² ut non circumveniamur a Satana non enim ignoramus cogitationes eius

¹³ cum venissem autem Troadem propter evangelium Christi et ostium mihi apertum esset in Domino

¹⁴ non habui requiem spiritui meo eo quod non invenerim Titum fratrem meum sed valefaciens eis profectus sum in Macedoniam

¹⁵ Deo autem gratias qui semper triumphat nos in Christo Iesu et odorem notitiae suae manifestat per nos in omni loco

¹⁶ quia Christi bonus odor sumus Deo in his qui salvi fiunt et in his qui pereunt

¹⁷ aliis quidem odor mortis in mortem aliis autem odor vitae in vitam et ad haec quis tam idoneus

¹⁸ non enim sumus sicut plurimi adulterantes verbum Dei sed ex sinceritate sed sicut ex Deo coram Deo in Christo loquimur