Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Лучше укрух хлеба со сластию в мире, нежели дом исполнен многих благих и неправедных жертв со бранию.

² Раб смыслен обладает владыки безумными, в братиих же разделит (имение) на части.

³ Якоже искушается в пещи сребро и злато, тако избранная сердца у Господа.

⁴ Злый послушает языка законопреступных, праведный же не внимает устнам лживым.

⁵ Ругайся убогому раздражает Сотворшаго его, радуяйся же о погибающем не обезвинится: милуяй же помилован будет.

⁶ Венец старых чада чад: похвала же чадом отцы их. Верному весь мир богатство, неверному же ниже пенязь.

⁷ Неприличны суть безумному устне верны, ниже праведному устне лживы.

⁸ Мзда благодатей наказание употребляющым: и аможе аще обратится, успеет.

⁹ Иже таит обиды, ищет любве: а иже ненавидит скрывати, разлучает други и домашния.

¹⁰ Сокрушает прещение сердце мудраго: безумный же биемь не чувствует (ран).

¹¹ Прекословия воздвижет всяк злый: Господь же ангела немилостива послет нань.

¹² Впадет попечение мужу смысленну: безумнии же размышляют злая.

¹³ Иже воздает злая за благая, не подвигнутся злая из дому его.

¹⁴ Власть дает словесем начало правды: предводителствует же скудости пря и брань.

¹⁵ Иже судит праведнаго неправедным, неправеднаго же праведным, нечист и мерзок у Господа.

¹⁶ Вскую бяше имение безумному? Стяжати бо премудрости безсердый не может. Иже высок творит свой дом, ищет сокрушения: остроптеваяй же учитися впадет во злая.

¹⁷ На всяко время друг да будет тебе, братия же в нуждах полезни да будут: сего бо ради раждаются.

¹⁸ Муж безумен плещет и радуется себе, якоже поручаяйся испоручит друга своего, на своих же устнах огнь сокровишствует.

¹⁹ Грехолюбец радуется сваром, а жестокосердый не усрящет благих.

²⁰ Муж удобопреложный языком впадет во злая: сердце же безумнаго болезнь стяжавшему е.

²¹ Не веселится отец о сыне ненаказаннем: сын же мудр веселит матерь свою.

²² Сердце веселящеся благоиметися творит: мужу же печальну засышут кости.

²³ Приемлющему дары неправедно в недра не предуспевают путие: нечестивый же укланяет пути правды.

²⁴ Лице разумно мужа премудра, очи же безумнаго на концех земли.

²⁵ Гнев отцу сын безумен, и болезнь рождшей его.

²⁶ Тщеты творити мужу праведну не добро, ниже преподобно наветовати властем праведным.

²⁷ Иже щадит глагол произнести жесток, разумен: долготерпеливый же муж премудр, лучше ищущаго науки.

²⁸ Несмысленному вопросившу о мудрости, мудрость вменится: нема же кто себе творит, возмнится разумен быти.