Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Человеку предложение сердца: и от Господа ответ языка.

² Вся дела смиреннаго явленна пред Богом, и укрепляяй духи Господь.

³ Приближи ко Господу дела твоя, и утвердятся помышления твоя.

⁴ Вся содела Господь Себе ради: нечестивии же в день зол погибнут.

⁵ Нечист пред Богом всяк высокосердый: в руку же руце влагаяй неправедно не обезвинится.

⁶ Начало пути блага, еже творити праведная, приятна же пред Богом паче, нежели жрети жертвы.

⁷ Ищай Господа обрящет разум со правдою:

⁸ праве же ищущии его обрящут мир.

⁹ Вся дела Господня со правдою: хранится же нечестивый на день зол.

¹⁰ Пророчество во устнех царевых, в судищи же не погрешат уста его.

¹¹ Превеса мерила правда у Господа: дела же Его мерила праведная.

¹² Мерзость цареви творяй злая: со правдою бо уготовляется престол началства.

¹³ Приятны царю устне праведны, словеса же правая любит Господь.

¹⁴ Ярость царева вестник смерти: муж же премудр утолит его.

¹⁵ Во свете жизни сын царев: приятнии же ему яко облак позден.

¹⁶ Угнеждения премудрости избраннее злата: вселения же разума дражайши сребра.

¹⁷ Путие жизни укланяются от злых: долгота же жития путие праведни. Приемляй наказание во благих будет, храняй же обличения умудрится. Иже хранит своя пути, соблюдает свою душу: любяй же живот свой щадит своя уста.

¹⁸ Прежде сокрушения предваряет досаждение, прежде же падения злопомышление.

¹⁹ Лучше кроткодушен со смирением, нежели иже разделяет корысти с досадительми.

²⁰ Разумный в вещех обретатель благих, надеяйся же на Господа блажен.

²¹ Премудрыя и разумныя злыми наричут, сладции же в словеси множае услышани будут.

²² Источник животен разум стяжавшым, наказание же безумных зло.

²³ Сердце премудраго уразумеет яже от своих ему уст, во устнах же носит разум.

²⁴ Сотове медовнии словеса добрая, сладость же их изцеление души.

²⁵ Суть путие мнящиися прави быти мужу, обаче последняя их зрят во дно адово.

²⁶ Муж в трудех труждается себе и изнуждает погибель свою: строптивый во своих устах носит погибель.

²⁷ Муж безумен копает себе злая и во устнах своих сокровищствует огнь.

²⁸ Муж строптивый разсылает злая, и светилник льсти вжигает злым, и разлучает други.

²⁹ Муж законопреступен прельщает други и отводит их в пути не благи.

³⁰ Утверждаяй очи свои мыслит развращенная, грызый же устне свои определяет вся злая: сей пещь есть злобы.

³¹ Венец хвалы старость, на путех же правды обретается.

³² Лучше муж долотерпелив паче крепкаго, (и муж разум имеяй паче земледелца великаго:) удержаваяй же гнев паче вземлющаго град.

³³ В недра входят вся неправедным: от Господа же вся праведная.