Бiблiя беларуская - пераклад Василя Сёмухи
(1995, Минск)

1-е Фесаланiкiйцаў

◄◄ | ◄ | Глава ⚫ | ► | ►►

¹ А пра часы і часіны няма патрэбы пісаць вам, браты,

² бо самі вы дакладна ведаеце, што дзень Гасподні так прыйдзе, як злодзей уначы.

³ Бо, калі будуць казаць: "мір і бясьпека", тады зьнянацку спасьцігне іх пагібель, як мука родамі спасьцігае цяжарную, і ня ўнікнуць.

⁴ Але вы, браты, ня ў цемры, каб дзень застаў вас, як злодзей;

⁵ бо ўсе вы - сыны сьвятла і сыны дня: мы - ня сыны ночы, ні цемры.

⁶ Дык вось, ня будзем спаць, як іншыя, а будзем чуваць і цьвярозіцца.

⁷ Бо, хто сьпіць, сьпіць уночы, і хто ўпіваецца, упіваецца ўночы.

⁸ Мы ж як сыны дня, будзем цьвярозіцца, апрануўшыся ў браню веры і любові і ў шалом надзеі на збавеньне,

⁹ таму што Бог вызначыў нас не на гнеў, а на атрыманьне збавеньня праз Госпада нашага Ісуса Хрыста,

¹⁰ Які памёр за нас, каб мы, ці то чуваем, ці то сьпім, жылі разам зь Ім.

¹¹ Таму ўмаўляйце адно аднаго і навучайце адно аднаго, як вы і робіце.

¹² Просім жа вас, браты, паважаць тых, якія працуюць у вас, і якія пастаўлены над вамі ў Госпадзе, і якія на розум вас настаўляюць,

¹³ і шанаваць іх пераважна зь любоўю за справу іхнюю; будзьце ў згодзе паміж сабою.

¹⁴ Молім вас таксама, браты, настаўляйце на розум бясчынцаў, суцяшайце маладушных, падтрымлівайце слабых, будзьце цярплівыя з усімі.

¹⁵ Глядзеце, каб хто каму не плаціў злом за зло; а заўсёды шукайце дабра і адно аднаму і ўсім.

¹⁶ Заўсёды радуйцеся.

¹⁷ Бесьперастанку малецеся.

¹⁸ За ўсё дзякуйце: бо такая за вас воля Божая ў Ісусе Хрысьце.

¹⁹ Духа не гасеце.

²⁰ Прароцтваў не прыніжайце.

²¹ Усё выпрабоўвайце, добрага трымайцеся.

²² Ухіляйцеся ад ліхаты ў любым яе выглядзе.

²³ Сам жа Бог міру няхай асьвеціць вас ва ўсёй поўніцы, і ваш дух і душа і цела ва ўсёй цэласьці няхай захаваюцца без пахібы ў прышэсьце Госпада нашага Ісуса Хрыста.

²⁴ Верны Той, Хто заклікае вас, Які і зьдзейсьніць гэта.

²⁵ Браты! малецеся за нас.

²⁶ Вітайце ўсіх братоў цалаваньнем сьвятым.

²⁷ Заклікаю вас Госпадам прачытаць гэта пасланьне ўсім сьвятым братам. Мілата Госпада нашага Ісуса Хрыста з вамі. Амін.